თანასწორობის მოძრაობამ პარლამენტს საკანონმდებლო წინადადებით მიმართა

„თანასწორობის მოძრაობამ“ საქართველოს სისხლის სამართლის კოდექსში ცვლილებების შეტანასთან დაკავშირებით საქართველოს პარლამენტში საკანონმდებლო წინადადება შეიტანა.

საკანონმდებლო წინადადების თანახმად:

• სისხლის სამართლის კოდექსის 131-ე მუხლის მოქმედი რედაქცია „შიდსი შეყრა“ იცვლება „სისხლის და სქესობრივი გზით გადამდები დაავადების შეყრით“;
• კანონპროექტით გათვალისწინებულია სისხლისსამართლებრივი პასუხისმგებლობის დაწესება სისხლის და სქესობრივი გზით გადამდები დაავადებების შეყრის/შეყრის საფრთხის შექმნისთვის;
• განსაზღვრულია დანაშაულის დამამძიმებელი გარემოებები;

საქართველოს სისხლის სამართლის კოდექსში შიდსის შეყრის შემადგენლობის ცალკე მუხლით მოწესრიგება ხელს უწყებს აივ ინფექცია/შიდსის მიმართ არსებული სტიგმის გავრცელებასა და განმტკიცებას, აძლიერებს სტერეოტიპულ დამოკიდებულებებს აივ-დადებითი ადამიანების მიმართ. გარდა ამისა, შიდსის შეყრის კრიმინალიზება აფერხებს აივ-ის პრევენციისა და მკურნალობის პროცესის განვითარებას, მათ შორის, ხელს უშლის ადამიანებს ჩაიტარონ ტესტირება და გაამჟღავნონ თავიანთი სტატუსი.

მიგვაჩნია, რომ შეთავაზებული ცვლილებების მიღება ხელს შეუწყობს აივ ინფექცია/შიდსის მიმართ არსებული სტიგმისა და დისკრიმინაციის დაძლევას. ცვლილებები  გააუმჯობესებს აივ-დადებითი ადამიანების უფლებრივ მდგომარეობას.