შსს “და ჩვენ ვიცეკვეთ” ჩვენებაზე: მოვუწოდებთ ყველას, დაიცვან კანონის მოთხოვნები

შინაგან საქმეთა სამინისტრო ეხმაურება ფილმის “და ჩვენ ვიცეკევეთ” პრემიერსთან დაკავშირებულ ძალადობრივ განცხადებებს ჰომოფობიური ჯგუფების მხრიდან.

”შინაგან საქმეთა სამინისტროს ერთერთი ამოცანაა ადამიანის უფლებების და თავისუფლებების დაცვა, განურჩევლად ადამიანის სქესის, რელიგიური კუთვნილების, სექსუალური ორიენტაციის, გენდერული იდენტობის, პოლიტიკური შეხედულების და სხვა ნიშნისა.

გავრცელებული ინფორმაციით, 2019 წლის 8, 9 და 10 ნოემბერს თბილისსა და ბათუმში მდებარე რამდენიმე კინოთეატრში მხატვრული ფილმის „და ჩვენ ვიცეკვეთ“ (And Then We Danced) პრემიერა იმართება. ასევე, საზოგადოების გარკვეული ჯგუფების მხრიდან კეთდება განცხადებები კინოჩვენების ხელშემშლელი ღონისძიებების შესახებ.

შინაგან საქმეთა სამინისტრო უზრუნველყოფს როგორც საზოგადოებრივი უსაფრთხოებისა და მართლწესრიგის დაცვას, ასევე, თითოეული ადამიანის გამოხატვის თავისუფლებას, რომელიც არ სცდება კანონით დასაშვებ ფარგლებს.

მოვუწოდებთ ყველას, დაიცვან კანონის მოთხოვნები. წინააღმდეგ შემთხვევაში, პოლიცია იმოქმედებს საკუთარი მანდატის ფარგლებში და სამართალდარღვევის თითოეული ფაქტი დაუყოვნებლივ იქნება აღკვეთილი,” – წერია განცხადებაში.

გუშინ, 5 ნოემბერს, “თანასწორობის მოძრაობამ”, ასევე კოალიციამ “თანასწორობისთვის” გაავრცელეს განცხადებები და მოუწოდეს შსს-ს, რომ დაიცან ფილმის ჩვენებაზე მისული ადამიანების უსაფრთხოება.