სექსუალური ორიენტაციის ნიადაგზე სიცოცხლის მოსპობის მუქარისთვის ერთ ადამიანს ბრალი წაუყენეს

პოლიციის ცნობით, 2019 წლის 19 მაისს, ღამის საათებში ჩაქვში, ზ.ყ., სექსუალური ორიენტაციის ნიშნით შეუწყნარებლობის მოტივით, სიცოცხლის მოსპობით დაემუქრა მოქალაქე უ. ყ.-ს. მუქარა გამოიწვია იმ ფაქტმა, რომ უ.ყ.-ს ქვიარ თემთან დაკავშირებულ ერთერთ ტელეგადაცემაში მონაწილეობდა.

შსს-ს ინფორმაციით, ბრალდებულ ზ.ყ.-ს წარედგინა ბრალდება სექსუალური ორიენტაციის ნიშნით შეუწყნარებლობის მოტივით სიცოცხლის მოსპობის მუქარის ჩადენისათვის, რაც გათვალისწინებულია საქართველოს სსკ-ის 151-ე მუხლის პირველი ნაწილით.

აღნიშნული მუხლის დარღვევა შეიძლება დაისაჯოს ქვევით ჩამოთვლილთაგან ერთერთი სანქციით:

• ჯარიმით;
• ან საზოგადოებისათვის სასარგებლო შრომით ვადით ას ოციდან ას ოთხმოც საათამდე, ან გამასწორებელი სამუშაოთი ვადით ერთ წლამდე;
• ან შინაპატიმრობით ვადით ექვსი თვიდან ორ წლამდე;
• ანდა თავისუფლების აღკვეთით ვადით ერთ წლამდე, იარაღთან დაკავშირებული უფლებების შეზღუდვით ან უამისოდ;

შსს-ს ცნობით, საქმეზე ჩატარდა შესაბამისი საგამოძიებო და საპროცესო მოქმედებები, მათ შორის, გამოკითხეს  ინციდენტის შემსწრე ყველა პირი, ხოლო საქმეზე გრძელდება გამოძიება.